瘀事一：
星期二果日請咗半日假interview，約咗九點半，一早就要見HR，講咗十數分鐘英文之後，再見另外Sales team嘅兩個人。兩個人一開門，嘩，大鑊，其中一個竟然係而家個老細個friend！仲要識咗好多年果隻！嘩！佢雖然笑笑口話啱啱先知邊個嚟in，仲叫自己千祈唔好同老細講話見到佢...... 當時心o諗嘩，你無嘢嘛，你千祈唔好同佢講見到我就真呀！...... in完之後日幾，突然記得忘記咗send thank you letter，成晚黑兩點幾先搵番以前嘅thank you letter改番send俾in過我嘅VP，好衰唔衰，原來自己封thank you letter唔記得改公司名，仲要個VP send番email俾自己講番先知，嘩，真係瘀爆呀！

瘀事二：
今日番工拎咗衣架上啱啱乾嘅褲著，平日阿媽驚條褲唔夠乾，會將個褲袋反出嚟吹乾，今次都唔例外，隨手拎起條褲反咗一反個褲袋就算...... 去到地鐵站，覺得條褲著得好似唔係好自然，不自覺咁摸一摸左後褲袋，嘩，點解有一邊後袋仲未反番入去o架？無理任何人嘅目光，下意識一邊行一邊馬上伸手反番轉個後袋，扮無嘢，但係果刻心o諗，唔知有無人睇到呢？好疼呀，好在未番到公司就發現，如果唔係實俾啲同事笑足一日，好彩好彩，呵呵呵！

瘀事日日有，瘀事日日新！